Homeopathy

ہومیوپیتھی کا مطلب ہے علاج بالمثل۔ جسے جرمن فزیشن ڈاکٹر ہانیمن نے انیسویں صدی میں متعارف کروایا۔ اس طریقہ علاج میں اسی دوا کی قلیل مقدار استعمال کی جاتی ہے جو بیماری جیسی علامات پیدا کر سکتی ہے۔ اب تک یہ معلوم نہیں تھا کہ ہومیوپیتھی دوا کیسے کام کرتی ہے لیکن اب سائنسی ترقی نے اسکی افادیت کو تسلیم کر لیا ہے۔ اور ایلوپیتھی کی میڈیکل کتابوں میں اس کا ذکر آنے لگا ہے۔ ہومیوپیتھی میں جو دوائیں استعمال ہوتی ہیں ان کو پودوں، جڑی بوٹیوں ، معدنیات اور دوسری اشیائ سے حاصل کر کے تیار کیا جاتا ہے۔ یہ دوائیں جسم کے مدافعتی نظام کو تحریک دے کر جسمانی بیماریوں کا علاج کرتی ہیں۔ درست ہومیوپیتھی نسخہ وہی ہوتا ہے جس میں ایک وقت میں صرف ایک دوا کا استعمال کروایا جائے۔ اور علامات کی تبدیلی کیساتھ بعض اوقات تبدیل کیا جائے۔ ہومیوپیتھی طریقہ علاج کے ذریعے نا صرف روز مرہ بیماریوں کا علاج کیا جاتا ہے بلکہ دمے اور جوڑوں جیسے مزمن امراض کا علاج ہوتا ہے۔ ہومیوپیتھی طریقہ علاج کو سمجھنے کیلئے آئیے ہم ایک تقابلی جائزہ لیتے ہیں۔ فرض کریں ایک مریض قبض کیساتھ ایلوپیتھک ڈاکٹر کے پاس آتا ہےتو ڈاکٹر اس کو ایسا کیمیکل (یعنی دوا) دے گا جو آنتوں کی حرکت کو بڑھا کر قبض کو وقتی طور پر ٹھیک کر دے گا۔ لیکن جسم کو جیسے ہی معلوم ہو گا کی اس کے اندر ایک ایسا کیمیکل آ رہا ہے جو آنتوں کی حرکت کو بڑھا رہا ہے تو جسم کا مدافعتی نظام اس دوا کے خلاف کام کرنے لگے گا اور نتیجے میں مریض کو دوبارہ قبض ہو جائے گی۔ اور مریض دائمی دوا کے استعمال پر مجبور ہو جائے گا۔ لیکن اگر یہی مریض ہومیوپیتھک ڈاکٹر کے پاس آتا ہے تو وہ اس کو بالمثل دوا دیتا ہے یعنی قبض کے مریض کو قبض کرنے والی دوا دی جاتی ہے لیکن اس کی مقدار اتنی کم رکھی جاتی ہے تا کہ جسم کو صرف یہ پیغام مل جائے کہ اس میں قبض کرنے والی دوا داخل ہو چکی ہے۔ لہذا جسم کا اپنا مدافعتی نظام جو کسی وجہ سے سست ہو چکا تھا اب متحرک ہو کر قبض کو درست کر دے گا اور یہ اثر مستقل ہو گا۔